چناب کالج کی بس اور ویگن میں تصادم،دو افراد جاں بحق جبکہ طلبہ و طالبات سمیت متعدد زخمی
چنیوٹ (ربوہ ٹائمز) نجی کالج کے بس ڈرائیور نے طلبہ و طالبات کو موت کے منہ میں دھکیل دیا جھنگ روڈ ٹول پلازہ کے قریب سکول بس اور ویگن میں خوفناک تصادم، دو افراد جاں بحق متعدد افراد زخمی ہوگئے
تفصیلات کے مطابق:
جھنگ روڈ پر ٹول پلازہ کے قریب چناب کالج کی بس اور ویگن میں خوفناک تصادم ہوا جس کے نتیجہ میں محلہ نور والا کے رہائشی محمد نذیر اور عمر نذیر جاں بحق ہوگئے جبکہ کالج طلبہ و طالبات سمیت آٹھ افراد زخمی ہوگئے جنہیں ریسکیو 1122 کے عملہ نے ڈسٹرکٹ ہیڈ کواٹر ہسپتال پہنچادیا مبینہ طور پر ریسکیو 1122 کے عملہ کی جانب سے واقعہ کے حقائق کو چھپانے کی کوشش کی گئی جبکہ میڈیا نے کالج انتظامیہ کی ناقص کارکردگی اور ریسکیو عملہ کی جانب سے ملنے والی غیر مصدقہ اطلاعات کا پول کھول دیا جبکہ حادثہ مبینہ طورپر نجی چناب کالج کے بس ڈرائیور کی نااہلی اور اوور ٹیکنگ کی باعث پیش آیا، ہسپتال ذرائع کے مطابق زخمی ہونیوالے محمد افضل۔حافظ ممتاز۔ عباس رضا۔ ساجد علی اور فاطمہ کی حالت نازک بیان کی جاتی ہے عینی شاہدین کا کہنا تھا کہ حادثہ کالج وین کے ڈرائیور کی مبینہ تیز رفتاری کے باعث پیش آیا ہے جبکہ دوسری جانب پولیس نے کالج وین کو قبضہ میں لے کر متوفی محمّد نذیر کے بیٹے کی مدعیت میں ڈرائیور کے خلاف مقدمہ درج کر لیا.
