پاکستانی فوج نے بھارتی فوجی ابھینندن کو رہا کردیا جو تا حال بھارتی فوج کی زیر حراست میں ہیں اور ان کو اپنے گھر بھی نہیں جانے دیا گیا
نئی دہلی (ربوہ ٹائمز نیوز ڈیسک) گزشتہ روز پاکستان کی جانب سے بھارت کے حوالے کیا جانے والا ونگ کمانڈر ابھینندن تاحال بھارتی فوج کی تحویل میں ہے اور اس سے پوچھ گچھ جاری ہے، ابھینندن کو اپنے گھر نہیں جانے دیا گیا۔
تفصیلات کے مطابق ’ہمارا ہیرو ابھینندن‘ اور ’ویلکم بیک ہیرو‘ کے نعرے پیٹنے والے بھارتی اپنے ہی ہیرو کی واپسی کے بعد اس کی طرف سے مشکوک ہوگئے ہیں۔ ونگ کمانڈر تاحال اپنے ہی ملک کی فورسز کی تحویل میں ہے اور اسے گھر نہیں جانے دیا گیا۔
ابھینندن فی الحال اسپتال میں ہے جہاں اس کی مکمل طور پر جسمانی جانچ پڑتال کی گئی، اس کے بعد اسے ڈی بریف کرنے کا سلسلہ جاری ہے۔
ابھینندن کو شک کی کڑی نگاہ سے دیکھا جارہا ہے اور اس سے سوالات کیے جارہے ہیں کہ آیا اصلی ہو یا نقلی؟ کہیں ایجنٹ تو نہیں بن گئے؟ پاکستان کے حامی تو نہیں بن گئے؟ تمہارادل و دماغ بدل تو نہیں گیا؟بھارتی ونگ کمانڈر کو تاحال اپنے گھر نہیں جانے دیا گیا، اپنے اہلخانہ سے اس کی نہایت مختصر ملاقات کروائی گئی جس کا دورانیہ صرف 9 منٹ تھا۔
یاد رہے کہ بھارتی پائلٹ ابھینندن کو 27 فروری کو گرفتار کیا گیا تھا جب وہ اپنا طیارہ لے کر تباہی کے ارادے سے پاکستانی حدود میں داخل ہوا، ایسے میں پاک فوج نے بروقت کارروائی کرتے ہوئے ابھینندن کے طیارے سمیت 2 طیاروں کو مار گرایا۔
طیارہ گرنے کے بعد ابھینندن کو مقامی افراد نے تشدد کا نشانہ بھی بنایا تاہم پاک فوج نے اسے بچا کر اپنی تحویل میں لے لیا، گزشتہ رات بھارتی پائلٹ کو خیر سگالی کے اظہار کے طور پر بھارت کے حوالے کردیا گیا تھا۔
