مریم نوازشریف کی پیشی ، نیب آفس کے باہر پولیس اور کارکنان میں تصادم
لاہور (ویب ڈیسک )مریم نوازشریف نیب کی پیشی کیلئے جاتی امراءسے روانہ ہو چکی ہیں لیکن نیب آفس کے باہر لیگی کارکنان اور پولیس کے درمیان تصادم شروع ہو گیاہے اور صورتحال کشیدہ ہوتی جارہی ہے ۔مریم نوازشریف کی گاڑی واپس موڑ دی گئی ہے اور کشیدہ صورتحال کے باعث وہ پیش ہوئے بغیر ہی واپس روانہ ہو گئیں ہیں ۔تفصیلات کے مطابق نیب آفس کے باہر لیگی کارکنان کی جانب سے پولیس پر پتھراﺅ کیا جارہاہے جبکہ پولیس نے کارکنان کو منتشر کرنے کیلئے ہوائی فائرنگ کی جبکہ آنسو گیس کی شیلنگ بھی جاری ہے ۔مریم نوازشریف قافلے کے ہمراہ نیب میں پیشی کیلئے پہنچی تو نیب آفس کے باہر کارکنان کی بڑی تعداد بھی موجود تھی ، مریم نواز کی گاڑی کو اندر داخل کرنے کیلئے پولیس کی جانب سے بیریئر ہٹایا گیا تو لیگی کارکنان کی بڑی تعدادنے گاڑی کے ساتھ ہی اندر جانے کی کوشش کی تاکہ وہ اپنی لیڈر کے ساتھ اظہار یکجہتی کر سکیں ۔کارکنان کو روکنے کیلئے پولیس نے پہلے پانی اور پھر آنسو گیس کی شیلنگ کی جس کے بعد لیگی کارکنان بھی مشتعل ہو گئے اور پتھراﺅ شروع کر دیا گیا ، پولیس نے کارکنان کو مشتعل کرنے کیلئے ہوائی فائرنگ کے ساتھ لاٹھی چارج بھی کیا گیا ۔نیب آفس کے باہر حالات کشیدہ ہو تے جارہے ہیں ، مریم نواز کی گاڑی واپس جا چکی ہے جبکہ ن لیگی قیادت کارکنان کو یہاں سے جانے کی ہدایت کر رہے ہیں تاہم صورتحال بدستور کشیدہ ہوتی جارہی ہے ۔
