پاکستان میں کورونا ٹیسٹ مثبت آنے کی شرح 5 فیصد تک پہنچ گئی
اسلام آباد(ویب ڈیسک) کورونا کی دوسری لہر کے باعث پاکستان میں عالمی وبا سے متاثرہ مریضوں کی تعداد میں اضافہ دیکھنے میں آ رہا ہے اور ملک میں کورونا مریضوں کی شرح 5 فیصد تک پہنچ گئی ہے۔
پاکستان میں گزشتہ 24 گھنٹوں کے دوران کورونا کے مزید 1313 مریض سامنے آ گئے جس کے بعد ملک میں کورونا متاثرین کی تعداد 3 لاکھ 37 ہزار 573 ہو گئی ہے۔
گزشتہ روز 18 افراد کورونا کی وجہ سے انتقال کر گئے جس کے بعد پاکستان میں کورونا سے اموات کی مجموعی تعداد 6 ہزار 867 ہو گئی ہے۔
ملک بھر میں دو نومبر کو 26 ہزار 565 ٹیسٹ کیے گئے جب کہ پاکستان میں کورونا کے ٹیسٹ مثبت آنے کی شرح 5 فیصد تک پہنچ گئی ہے۔
جیو نیوز کے پروگرام آج شاہزیب خانزادہ کے ساتھ میں گفتگو کرتے ہوئے وفاقی وزیر اور این سی او سی کے سربراہ اسد عمر نے کہا ہے کہ چند ہفتوں میں عوام نے سمجھا کہ کورونا ختم ہو گیا ہے اور حفاظتی تدابیر پر عمل بالکل کم ہو گیا۔
اسد عمر کا کہنا تھا کہ ستمبر کے آغاز سے اب تک مثبت کیسوں کی شرح اور اموات میں دوگنا سے زیادہ اضافہ ہوا ہے۔
ان کا کہنا تھا امید ہے ایسی صورتحال میں نہیں جائیں گے کہ انتہائی اقدامات اٹھانا پڑیں۔
وفاقی وزیر نے کہا کہ فیصلہ کیا گیا ہےکہ کچھ عرصے کے بعد شادی کی تقریبات آوٹ ڈور کی جائیں، اس سے خطرہ کم ہو سکتا ہے، حکومت کازیادہ زور ماسک کی پابندی پر ہے۔
