چناب نگر: منشیات فروشوں کے خلاف پولیس کی کامیاب کارروائی
چناب نگر (نمائندہ خصوصی) ایس ایچ او تھانہ چناب نگر کی ہدایت پر پولیس نے منشیات فروشوں کے خلاف بھرپور کارروائی کرتے ہوئے ایک بڑی کامیابی حاصل کی ہے۔ کارروائی کے دوران پولیس نے مشہور منشیات فروش آفتاب کو گرفتار کر کے اس کے قبضے سے پچیس لیٹر شراب برآمد کر لی۔
پولیس ذرائع کے مطابق مقدمہ اسسٹنٹ سب انسپکٹر عبدالرحمن کی مدعیت میں درج کیا گیا ہے جبکہ ملزم کو مزید تفتیش کے لیے حوالات منتقل کر دیا گیا ہے۔ پولیس کا کہنا ہے کہ علاقے میں منشیات کے مکروہ دھندے میں ملوث عناصر کے خلاف زیرو ٹالرنس پالیسی کے تحت کارروائیاں جاری ہیں۔
ایس ایچ او تھانہ چناب نگر، اے ڈی ہرل نے میڈیا سے گفتگو کرتے ہوئے کہا کہ منشیات معاشرے کے لیے زہر قاتل ہیں اور ان کے خاتمے کے لیے پولیس دن رات سرگرم عمل ہے۔ ان کا مزید کہنا تھا کہ علاقے کے امن و سکون کو خراب کرنے والوں کو کسی صورت رعایت نہیں دی جائے گی۔
مقامی شہریوں نے پولیس کی اس کارروائی کو سراہتے ہوئے امید ظاہر کی ہے کہ اسی طرح کی سخت کارروائیوں کے ذریعے علاقے کو منشیات جیسے ناسور سے پاک کیا جا سکے گا۔
